Kategori: Postim

Në mbrëmjen e datës 24 nëntor 2018, publiku slloven dhe shqiptar në Koper ishte dëshmitar i një ngjarje artistike, që vështirë se përsëritet. Në katedralen e qytetit u organizua koncerti i sopranos së madhe Inva Mula, shoqëruar nga pianistja Lule Elezi. Koncerti ishte pjesë e veprimtarive të shumta në kuadrin e Ditëve të Kulturës Shqiptare, organizuar nga Shoqata Shqiptare “Iliria”. Para koncerit të pranishmit i përshëndetën kryetari i Shoqatës “Iliria” Heset Ahmeti, ambasadori i Shqipërisë Pëllumb Qazimi dhe Profesor Shyqyri Nimani. I pranishëm, përveç publikut artdashës ishte edhe kleriku, drejtues i katedrales së Koperit. Koncerti i të mirënjohurës Inva Mula, përfqaqëson një ngjarje, që vështirë se përsëritet dhe që do të mbetet gjatë në memorien e të pranishmëve dhe të jetës artistike të qytetit. Koncerti u zhvillua pikërisht në atë katedrale, ku rreth tre shekuj më parë drejtonte meshat shqiptari Agustin Bruti. Para koncertit, në katedrale u zhvillua meshë në gjuhën shqipe dhe italiane, nën drejtimin e Don Krist Gjergjit, drejtues i Misionit Katolik Shqiptar në Zagreb.

Në datën 24 nëntor 2018, në Koper u organizua ceremonia e promovimit të librit në gjuhën sllovene “Monumenta Albanica Justinopolitana” me autor Peter Štoka. Autori pas një pune kërkimore e shkencore rreth katër vjeçare ia ka arritur të sjellë për publikun e gjerë dhe jo vetëm kaq, historinë e më shumë se katërmbëdhjetë familjeve të vjetra fisnike shqiptare me banim e kontribute shekuj më parë në Koper të Sllovenisë në periudhën e Venedikut. Pasioni, profesionalizmi, shfrytëzimi i burimeve të shumta, madje edhe të panjohura, paraqesin një botim shkencor, që hedh dritë jo vetëm për njohjen më të thellë të historisë shqiptare jashtë trojeve shqiptare, por ofron një kontribut të jashtëzakonshëm për studjuesit. Libri përfaqëson një tregues të qartë edhe të marrëdhënieve e të bashkëpunimit ndërmjet popujve tanë në një periudhë jo shumë të qartë deri tani sa i përket shqiptarëve në Slloveni. Në ceremoni merrnin pjesë organizatorët, Shoqata Kulturore “Iliria” dhe kryetari i saj Heset Ahmeti, përfaqësues të Ministrisë të Diasporës të Kosovës, Kryetari i Bashkisë Koper, Boris Popović, shqiptarë nga Koperi e Sllovenia në tërësi, shqiptarë nga Italia dhe Kroacia, si dhe Ambasada e Shqipërisë dhe Ambasada e Kosovës. Të pranishmit i përshëndetën kryetari i Bashkisë Boris Popović, ambasadori i Shqipërisë Pëllumb Qazimi dhe zëvendës ambasadorja e Kosovës Mirjeta Behluli. Rreth librit foli autori, Peter Štoka, si dhe profesor Shyqyri Nimani, i cli promovoi gjithashtu edhe librin e tij »Albanese«. Në muajt në vijim libri i Peter Štoka do të botohet edhe në gjuhën shqipe dhe në gjuhën italiane.